FROM "TSINELAS NGA NALUBONG SA DANAW" BY VICENTE VIVENCIO BANDILLO

duquesa de alba

gipahigda ko ikaw
sa namiyuos nga panganod
sa kama sa kaadlawon
ug nagtagik kog soneto
nga bunga sa alimungaw
tadlas sa habog mong dughan
subay sa imong baba sa atay
dayon patighulog
ngadto sa walay kibo
nga kapatagan sa imong pus-on
diin dili na modulot ang tinta
kay didto walay hunong
ang paghunob sa asgad nga singot
sa kagahapon



* * * * * *



iyaan sa ayaay


Pagdunggo pa lang sa ilang sakayan sa gamayng isla sa Donsol aron bawion ang iyang periko nga nahipadpad didto, ang akong tiya nangayo dayon og usa ka bol nga tuba. Sa edad nga kwarenta anyos wala pa siya maminyo ug, kay medyo tambokon man siya, ang hamis niyang panit nagsinaw sa pagkabuwad sa adlaw samtang ang pustiso niyang oro tsina nagpangidlap sa langas nga pagpasagad. Diha-diha giila siyang hara sa mga manginginhasay sa maong dapit, ug sa ngadto-ngadto ang periko naghikog sa iyang mga kamot ug, pila ra may sugilanon, sa kadaghan sa iyang mga paryente walay nakatuhog sa mga taho sa iyang paglatagaw nga maayong pagkabaligtos sa kandiis sa dagatnong huyuhoy. 



* * * * * *



ang sambol nga kangitngit


gaan og buot nga tighanduraw sa hangin
sa lanog sa hagawhaw sa abog sa kupo
sa anino nga wala mapulak wala mokanaw
gikan sa mga mata sa pinugngang talidhay
sa ulan sa panumdoman nga mibuhagay
daw alimyon sa mga bituon daw kidhat
sa kamingaw nga gikudlit sa dilaab
sa daob sa kilumkilom nga nag-inusara
sa miaging usa ka gatos ka gutlo ubos
sa mga dahon nga naghupot sa yuta
dihay miturok nga bulan taliwala kanato
kahilom nga wala mokanaw wala mapulak
sulod kanato ug sa atong mga palad
diin mikuyanap ang sambol nga kangitngit



* * * * * *



ang apostol sa katalagman


1
Nahinanok man o nahisum-ok sa buhilaman
Tin-aw kong maaninaw ang nagdulong nga kasakit
Ako nga gipatawag aron mapanalanginan
Ang pagbukhad ug hinanaling pagtiklop sa langit

2
Wala koy laing giangkon gawas sa kalibotan
Ug walay kamatayon nga dili sa akong ngalan



* * * * * *



Kon aduna lang unta koy gamayng kahangtoran


Kon aduna pa lang unta koy gamayng kahangtoran
Suroyon nako ang Pilipinas
Hapnigon nako ang akong mga panyo ug medyas
Tagsa-tagsaon nakog hinumdom ang tanan kong mga sala
Aron ako silang mahinulsolan pag-ayo
Magtuon kog Griyego Antigo
Aron makabasa ko ni Homer sa orihinal ug usab ni Pindar
Daghan kong gustong buhaton
Gani magtuon kog touch method sa pag-type
Unya sulayan nakog kanta ang My Way bahalag mapusilan
Apan tungod kay milingay na ang akong adlaw
Ang ako na lang nga aduna koy igong panahon ug kalinaw
Paghinumdom sa atong gugma
Nga wala itugot sa kapalaran



No comments:

Post a Comment